منتديات سعودي بويز

#1 (**permalink**) 12-13-2009, 06:10 AM

بسم الله الرحمـن الرٍحيم

كيفكم يآ أعضآء إن شآء الله الكل تمآم ومبسوط ع الآخر

جآء في بالي فجآه إني أألف روايه

قلت ليه لآ خليني أجرب واشوف وش يطلع معي

وعلىآ فكره هذي أول مره أحاول اكتب فيهآ روايه

نبدآ بسم الله ~

- تحت الأرض أحبك -

الشخصيآت

الجد والجده [ أم علي و أبو علي ]

. فهد .
وزوجته كوثر
عيآله :
- بدر . 22 سنه .
- علي . 20 سنه .
- ساره . 16 سنه .
- مشعل . 9 سنوات .

هدى وزوجها عبد الله
بناتها :- سولاف . 18 سنه .
- رهف .17 سنه .

فاطمه وزوجها طلال
عيالها :
- محمد . 23 سنه .
- خالد . 20 سنه .
- بسام . 19 سنه .
- ليلى . 16 سنه .
- ميمونه . 18 سنه .

علي عزوبي مطلق
ماعنده عيال

( الجزء الأول )

فتحت عيونها الرماديه الجذابه بصعوبه على صوت أمها
وكانت تعبانه من الجمعه الي امس في بيت جدها ابو علي
- هدى : يمى سولاف قومي تاخرتي على دوامك
- سولاف بنوم : زين يما الحين أقوم وغطت وجها بالحاف
- هدى بغضب : قومي ولا ترى بيجيك الحين كاس الماي على راسك يصحيك عدل

سولاف على طول فزت من السرير خافت أمها تنفذ تهديدها
لبست مريولها وهي تقول بنفسها : يلا كلها سنه وحده وبفتك من هالمريول ومن المدر سه . عدلت شعرها وضبطت اغراضها ونزلت تحت عشان تفطر قبل لا تروح المدرسة
شافت اختها رهف سابقتها مثل كل مره ومخلصه فطور ولابسه عبايتها
رهف : أخيرا جات حضرة الاميره النائمه
لين متى على هالحال كل يوم اتخر بسبتك
سولاف من غير نفس : أقول اسكتي خليني افطر واخلص عشان نطلع بسرعه
رهف : يلا بسرعه استناك
سولاف : ok

في بيت فهد
بدر منسدح على السرير وغارق يفكر بالي شافها امس بالغلط في بيت جده بدون ماتنتبه له
- الله ياسولاف والله كبرتي وحلويتي حيل
شكلك يسحر بقوه
أخ ع العيون الواسعة والشفايف التوت .......
وهو قاعد يفكر دخلت عليه امه تشوفه لانها استغربت انه ماجاء فطر معاهم كالعاده
ام بدر : يمى ولدي شفيك ليش ماجيت تفطر
وبعدين ماعندك دوام اليوم ؟!
بدر : هلا يمى والله مالي نفس فطور
والدوام اووووف اليوم ماعندي شي في الجامعه
بس تراي بعد شوي طالع مع خويي صالح عن اذنك بتجهز عشان اطلع
ام بدر : الله يحفظك خل بالك على نفسك ولا تتاخر بالرجعه
بدر : حااضر من عيوني كل ام بدر عندي

راح اخذ له شاور وطلع من الحمام لبس ثوبه والشماغ وتعطر وطلع من غرفته شاف اخته ساره قدامه
بدر بتعجب : ماعندك مدرسه اليوم ؟!!!
ساره بوهقه : هاه .. الا عندي بس صحيت وراسي مصدع وتعبانه قلت اريح شوي ولا اداوم
بدر وهو عارف اساليب اخته والاعيبها : زين ياساره الحين انا مو فاضي لك مواعد خويي وخايف اتاخر عليه بس ارجع اوريك كيف تكذبين على اخوك وفي ايش في موضوع المدرسه !
ساره يوووووووووه شيفكني من هذا الحين وش دخله في مدرستي : ومن قال اني اكذب حتى اسال امي اني طلبت منها بندول
بدر : شايفتني هندي قدامك !
طيب طيب ياسويره خليني ارجع بس
وطلع
ساره ارتاحت لأنها افتكت منه وراحت تكمل فلتها ولعبها

الساعه 5 العصر
بيت ابو علي

ام علي : شرايك يابو علي نجمع العيال في المزرعه هالاربعاء
ونجلس فيها خميس وجمعه تغير جو
ابو علي : اشوف امور المزرعه واذا كل شي جاهز ومرتب من عويناتي
ام علي ببتسامه : تسلم عويناتك

واتفقوا انهم يتجمعون كلهم بالمزرعه
جاء يوم الاربعاء والكل حضر عدا علي الي يقول عنده اشغال وشركات ومو فاضي يجي

ساره : هلآ جدتي ام علي شلونك وحشتيني والله
ام علي : هلا بالغاليه بنت الغالي انا بخير بشوفتكم والله انتي شلونك وشلون اخوانك
ساره بدلع : تدرين البنت الوحيد وكل الدلال لي يعني الامور ماشيه والحمد لله
ام علي : دوم يابنتي اشوفك مبسووطه وسعيده
ساره : امين

ميمونه شافت ساره من جات على طول على جدتها لانها تحبها اكثر وحده : ماتجين تسلمين علينا اول ماجيتي على طول طبيتي على ام علي
واحنا ماعندنا رب يعني !
ساره بتكبر : هلا هلا ميمونه شلونك وشلون اختك وينها ما اشوفها
ميمونه – طووول عمرك متكبره ومغروره - : والله اختي جالسه برا مع سولاف ورهف وانا بعد شوي رايحه لهم
شرايك تجين معي
ساره : طيب انا توني جايه بسلم على خالاتي واجي لك
ميمونه : طيب

في مجلس الرجال

ابو علي : ياحلو جمعتكم والله ياعويلي الله يدوم هالجمعات ولا يفرقنا
الكل : امين
فهد : لولاك يا يبه كان لا تجمعنا ولا شفنا بعض الله يطول عمرك يالغالي
بدر : وعمي صادق الله يخليك لنا
ابو علي بضيق : العمر مابقى له شي ياعيالي ابي الود والمحبه يدوم من بعدي هذي وصيتي لكم ولا احد يفرط فيها
خالد وهو يبي يغير الجو الكئيب بصوت عالي : اقول شباب شرايكم نروح المسبح الحين قبل لايحتولنه البنات ونروح وطي
بسام : أي والله وانت الصادق يلا مشينا
وطلعوا كلهم يروحون يسبحون عدا ابو علي وفهد الي قعدوا يسولفوا مع بعض

عند البنات

سولاف : الله يابنات اليوم شكله فله مره شكلي مراح انام الا اذا طلعت الشمس
ليلى : أي والله خلينا اليوم نقلبها صبااحي
ونفلها ياناس نبي نغير جو

ميمونه وهي جايه بالشاي والفصفص : واكيد ماتحلا الجلسه بدون الشاهي والفصفص
رهف بضحكه : جات جات ام بطن
الكل : هههههههههههههههههه
وعلى صوت ضحكاتهم جاتهم ساره
ساره بتكبر : على وشو تضحكون
ليلى : هلا ساره حياك اجلسي
ساره : أي بجلس اجل وش جايه اسوي
رهف وهي مو طايقه جلسة ساره المتكبره معاهم : اقول ميمونه شرايك ناخذ لنا كم لفه في المزرعه
ميمونه وهي فاهمه سالفة رهف ببتسامه : يلا بس مابي اطول
رهف بغضب : طيب طيب

جا اليوم الثاني واكل تعبان ونايم
الشباب طلعو من المسبح الفجر وكل ومن التعب صلوا بسرعه وناموا
والبنات طبقوا كلامهم وسهروا وبعد الصلاه نامو

الساعه 10 الصباح صحت ام علي كالعاده
وصحوا معاها الحريم كوثر وهدى وفاطمه

وراحو يجهزون الفطور

كوثر : الله يغربل بليس هالعيال امس مانامو الا عند صلاة الفجر وش يصحيهم الحين !
هدى : وين تصحينهم خليهم نايمين وبعدين نصحيهم لصلاة الظهر
ام علي : خلوهم يستانسون شعليكم منهم

وكملو سوالفهم وفطورهم
وجهزوا فطور واعزمو معاهم ابو علي وفهد وجاو فطروا معاهم

صارت الساعه 11 صحى بدر من المنبه لأنه ضبطه قبل لا ينام مايبي يتأخر في النوم
راح غسل وجهه وهو قاعد يغسل جات في باله
ياترى وش جالسه تسوي الحين
طيب انا ليش مهتم لايكون حبيتها يابدر
لالا مو معقوله بالسرعه هذي وبنظره وحده خطفت قلبك !
الله عليك ياسولاف منتي هينه والله خطفتي قلبي بنظره وحده منه لكِ

راح الصاله وشاف الكل متجمع فيها
سلم عليهم وطلب من امه تسوي له شي ياكله لانه حده جايع
امه قامت تسوي له شي ياكله وهو جلس معاهم يسولف
وهو جالس دخلت عليهم سولاف وفز قلبه لما شافها

سولاف كانت لابسه عباتها لانها داريه انه كان بلصاله لما سمعت صوته
سولاف : صباح الخير
الكل : صباح النور
بدر : صباح الورد

سولاف : يمه شفتي شنطتي مادري وين قطيتها امس لما جيت
هدى : أي انا جمعت كل الشنط بالغرفه هناك روحي وتشوفينها
سولاف : ok
عيون بدر متابعه لكل حركه لسولاف لما طلعت من الصاله

ام بدر : هاك ياولدي اكل
بدر : لا خلاص مالي نفس يمه انا بروح اتمشى بالمزرعه شوي
ام بدر : يؤ خذ لك لقمه بدال ماتطلع على لحم بطنك

بدر استسلم لانه كان ميت جوع : تدرين خلاص باكل الاكل كله لعيونك بس
ام بدر بضحكه : أي لعيوني مو لعيون بطنك
الكل : هههههههههههههههههه
خلص بدر الاكل
وطلع وقال بنفسه مراح تعدي هاليومين الا وسولاف عارفه اني أحبها

أنتظروا الجزء الجآي

أتمنى أنهآ تعجبكم ..

12-13-2009, 06:31 AM

( الجزء الثآآني )

العصر بعد الغداء ..

بدر : اقول ساره هاتي جوالك بكلم رصيدي مخلص
ساره بدلع : بس تشحن لي الي تكلم فيه وزود بعد

بدر : 100 ريال وش تبين بعد
ساره بتعجب من بدر : يآآآآآي 100 ريال شكل هالمكالمه همه مره
خذ الجوال كلم فيه لما تشبع بس لا تنسى الـ 100 ها

بدر وصبره بيخلص من اخته : طيب هاتي اشوف
عطته الجوال وطلع برا ع اساس انه بيكلم
بدر – اكيد رقم سولاف مخزن بجوالها –
ولقى أسم سلوفآ ,
قآل اكيد هذي الحب فديتها
واخذ الرقم وسجله بجواله وقبل لا يرجع جوال اخته كلم فيه خويه عشان ماتشك وخلص الرصيد كله عناد فيها

عند البنات

سولاف : مابغيتوا تصحون من النوم اليوم الصباح جلست لحالي
مالت بس
ليلى : وانتي وش الي صحاك بدري كان كملتيها نومه
سولاف : مادري بس صحيت وماجاني نوم ابد
رهف : غررررريبه انتي ام النوم واليوم صاحيه من صباح الله خير
وفي الاجازه قسم انك مقلوبه بقوا
سولاف : ههههههههههه شفتي كيف , يلآ ماعلينا من نومي
قوموا خلونا نروح المسبح دورنا اليوم
ميمونه : ايييييييه تكفون من امس وانا ودي اروح بس الشباب سبقونا
ليلى : ههههههه ايه لاحظت عليكِ امس كسرتي خاطري يااخوتي العزيزه
ميمونه : اقول لا يكثر وقوموا بس

البنات قاموا ويتجهزون ويسبحون

( في المسبح )

ليلى : اقول بنات نادوا ساره نسيت اناديها لاتزعل علينا بعدين
رهف بغضب : يووووه وش تبون بالعله هذي متكبره ورافعه خشمها علينا
سولاف : حرام عليكِ الحين انا اروح اكلم اخوها الصغير مشعل يشوف وينها ويناديها
طلعت سولاف من المسبح وكانت لابسه شورت اسود فوق الركب وبلوزه علاق لونها رمادي
وقفت عند باب المسبح تشووف كان مشعل موجود يلعب ولا لا
وهي واقفه وتنظر – خليني ادق على امي تناديها كيف بطلع وانا كلي مويه وبالبس هذا –
اخذت جوالها ودقت على امها وقالت لها سكرت من امها حطت الجوال ع الطاوله وهي ماشيه ترجع سمعت صوت الجوال يرن ( رنه الرسايل )
سولاف – دام انها رساله اشوفها بعدين الحين بروح اكمل سباحتي مع البنات –
ورجعت للمسبح وقالت للبنات انها دقت على امها تقول لساره تجي

رهف : عساها ماتجي قولوا امين
ميمونه : قسم انك مرجوجه وش دخلك بالبنت اصلاً هي ملاحظه انك ماتطيقينها كل ماجات مكان رحتي مكان ثاني
رهف : وش اسوي بس اشوفها احس ان الحياه ضاااااااقت ومافي نفس مره
ميمونه : اوف اوف الله لا يبلانا
رهف بغضب : انقلعي
فتره وجات لهم ساره
وكملو سباحه وسوالف واكيد رهف مو ماخذه راحتها

مرت الساعات و الدقائق وصار الليل ..

البنات طلعوا من المسبح وكان فيه حمامين بالمسبح
ميمونه و رهف سبقوا ليلى و سولاف وساره ع الحمامات عشان ياخذو شور
جلسو يستنوا رهف وليلى ويسولفو مع بعض
ساره بتكبر: انا بروح الحمام الي بالفلا مافيني اصبر مره
سولاف : كيف راح تطلعي كذا كلك مويه
ساره راح البس العبايه عادي
ليلى : سولاف خلي البنت على راحتها
سولاف : ok براحتك
لبست ساره عبايتها وطلعت

سولاف تذكرت المسج الي جا لها وراحت تشيك ع الجوال
فتحت المسج شافته من رقم غريب
( من شفتك وانا مو قادر اطلعك من بالي ,
سولاف عندك شي يخصني
وهالشي ما اقدر اعيش بدونه .. وهو قلبي
وعشان اعيش لازم اكون جنبك )

سولاف جاها خوف من هالمسج خصوصاً ان الي مرسل المسج يعرف اسمها
ليلى لاحظت على سولاف تغير ملامحها : سولاف شفيك !
سولاف : ها .. ووو لا شيء – وعشان تضيع السالفه – مو كأن البنات تأخروا في الحمام
ليلى بشك : أي تأخرو بروح الحين اكلمهم .........

عند الشباب ..

علي بنفسه – اوف لين الحين ماشفتها وين مختفيه هذي ,
آآآآآه يا ميمونه يآني احبك حب من وانا بزر فديييييييتك –
خالد يقطع عليه افكاره : هي يا ابو الشباب مين الي سارق عقلك ومخليك في 60 داهيه هههههههه
علي – والله اختك هي الي سارقتني ومذوبتني - : لا بس جالس افكر بالجامعه والاختبارات , انت عارف الوضع
خالد : أي والله الله يساعدنا شي يكسر الظهر
خصوصاً الطب مع اني كنت ابيه بس زين اني مادخلته ورحت هندسه
علي : أي والله انك ارتحت , شوف ولد خالك كيف متعذب ........

بدر وهو توه داخل وسمع كلام اخوه : هذا وانت في البدايه اجل شلون بعد كم سنه
علي : وينك انت مختفي لي ساعه ادور فيك
بدر بوهقه : انا كنت بالحمام
علي : شكلك عندك امساك مزمن كل ذا بالحمام الله لا يبلانا بس اقول امك تبينا نجيب عشاء من برا يلا مشينا
بدر : يلا .....

يوم الجمعه الكل بعد الغداء رجع بيته لأن يوم السبت دوام ,

بعد اسبوع

سولاف جالسه بغرفتها تتأمل المسج الي شغل بالها ولاهي عارفه من مين وكيف يعرف اسمها !
- لا يكون مقلب من البنات اممممم لالا ما اظن لو مقلب كان قالو صار على السالفه اسبوع ولا احد ملمح ولا شيء ....-
رهف : سووووووولاف هي وين وصلتي
سولاف بطناز :المريخ ك ك ك
رهف : ياخف دمك
اقول وش فيك من رجعنا من المزرعه وانتي دايماً شارده وبالك مو معانا ..
سولاف قررت تقول السالفه لاختها وصديقتها رهف : تبين الصراحه – وعطتها الجوال – شوفي هالمسج وصلني لما كنا بالمسبح ولاني عارفه من مين !
رهف قريت الرساله وقالت بغضب : وانتي يالفااااااااااالحه ماكنتي ناويه تقولين لي !
زين اني سالتك ولا كان ماقلتي مالت بسس
سولاف : اقول اركدي وقولي لي من مين تتوقعي يكون
رهف : هذا عارف أسمك
سولاف : ايييييه وهذا الي مخوفني وشاغل بالي لو كان مو عارف اسمي قلت واحد فاضي ويلعب
رهف : والله مادري ........ يووووووه نسيتيني ليه انا جايه لك ترى بعد شوي خالي جااي هو وعياله يتغدى عندنا تجهزي ,,
سولاف : يؤؤ طالعي الساعه توك تقولين لي حضرت جنابك
رهف : اقول اتركي الهواش وقومي البسي وانا بروح البس

وقامت رهف راحت غرفتها تلبس
سولاف اخذت شاور وطلعت استشورت شعرها مع انه نااااعم مره بس ماكان في وقت ينشف ولبسب بلوزه بيضاء تيشرت ناعمه عليها فراشه تلمع وجينز ازرق غامق ورفعت شعرها
اما رهف لبست فستان احمر ناعم فيه شريطه سوداء تحت الصدر

رن الجرس " تيتون تيتون "

الشغاله مآري : تيب تيب مين ؟
فهد : انا فهد افتحي الباب
فتحت الباب ودخل فهد مع زوجته وبنتهم ساره ومشعل

جات هدى ورحبت بأخوها وزوجته وعياله
هدى : ليش الشباب ماجاو معاكم حسبت لهم حساب الغدا

كوثر : الاولاد اليوم طالعيين مع اصحابهم يتغدون برا فخليتهم جينا حنا بس ,,
إلآ وين البنات ما اشوفهم ناديهم نسلم عليهم
هدى ببتسامه : ماري نادري البنات يجون يسلمو على خالهم وزوجته
ماري : ok مدام
نزلوا وهم وسلموا على خالهم وزوجته
فهد : ماشاءالله كل يوم يزيدو حلا الله يحفظهم يخليهم
كوثر كانت حاطه سولاف ببالها لولدها بدر و رهف لعلي : أي والله يابدو بدر كل وحده عروسه وش زينها
وطبعاً سولاف ورهف خجلو مره وحرارتهم وصلت 40

هدى : الله يخليكم كلكم ذوق والله .. يلا تفضلوا الغدا جهز
فهد : يالله بسم الله ,,,

بنفس الوقت في بيت صاحبه سولآف على الغداء ,
أم عبد العزيز : أقول نوره وش صار على صاحبتك سولاف من زمان ماشفتك تكلمينها
عبد العزيز سمع كلام امه وركز معاهم بالكلام
نوره : كانت تقرين افكاري يمه توها جايه في بالي كنت بعد العذا بدق عليها
ام عبد العزيز : سلمي لي عليها وقولي لها توصل سلامي لامها
نوره : ok بقول لها

---

أتمنىآ أنٌ البآرت يعجبكو

وقولوا توقعاتكم

12-13-2009, 06:37 AM

( الحزء الثآلث )

بنفس الوقت في بيت صاحبه سولآف على الغداء ,
أم عبد العزيز : أقول نوره وش صار على صاحبتك سولاف من زمان ماشفتك تكلمينها
عبد العزيز سمع كلام امه وركز معاهم بالكلام
نوره : كانك تقرين افكاري يمه توها جايه على بالي كنت بعد الغدا بدق عليها
ام عبد العزيز : سلمي لي عليها وقولي لها توصل سلامي لامها
نوره : ok بقول لها
عبد العزيز بجرءه : يمه ابيك تخطبينها لي
نوره بفرح : يؤؤ عبد العزيز تتكلم من جد انت واااااااااااو يعني سولاف بتصير زوجة اخووي
ام عبدالعزيز وهي مو مصدقه ان عبد العزيز اخيراً طلب انه يتزووج :
خلاص ياولدي بس خلني ارتب الامور وخطبها لك على طول
عبد العزيز بنفسه - آه ياسولاف متى بتصيرين ملكي بس !- : يلا يمى انا طالع ولاتنسين الموضوع ها
ام عبد العزيز ببتسامه : وهالموضوع ينسي اصلاً

المغرب على البحر
بدر وخويه صالح

بدر : صالح انا قررت اتزوج
صالح وهو مو مصدق : اقول عن الكلام الزايد قال بتزوج قال
بدر : وش فيك اتكلم من جد أنا , ياخي ماتدري وش صاير لي هاليومين
صالح : صاير ولا ماصاير كلنا صاير لنا بس لا تستعجل ولا اخوك تو الناس ع الزواج حتى دراسه ماكملتها
بدر : وانت الصادق بس اخلص دراسه اروح اخطبها
صالح : اوه شكلك مختار ومخلص
بدر : ساحرتني ياصالح ساحرتني ولاني قادر اصبر
بس كلها كم سنه واخذ قلبي
صالح : منهي هذي الي ساحرتك ومسوي فلم هندي عليها
بدر : بنت عمتي ...
وقال له قصتة وكيف حب سولاف و خطفت قلبه بنظره وحده بس ,

وهم يتحاورون جوال بدر دق ...

بدر : لحظه صلوح اشوف من داق عليّ
طلع جواله وشافه رقم سولاف حس ان الارض انشقت وابلعته
- صالح هذي سولااف وش اسوي –
صالح : مو انت تبيها تدري انك تحبها ياخي رد وقولها كل الي بقلبك وارتاح
بدر بتردد : مادري والله اخاف تتغير نظرتها لي ولا تفهمني غلط

صالح : ماني فاهمك انا مره متهور ومره خايف
بدر : ماني راد ..

--

عند سولاف واختها رهف
سولاف : ماحد يرد
رهف : اكيد شاف رقمك ولا رد اقول امسكي دقي من جوالي خلينا نخلص هالقلق
سولاف : فكررره هاتي جوالك بسرعه
ودقت على بدر من جوال اختها

--

جوال بدر دق : شافه رقم غريب
ومتردد يرد
صالح : وش فيك انت رد طالع هذا مو رقمها
بدر بضحكه : شفت شلون هالبنت لحست مخي
ورد : الو
سولاف لأختها – رد رد - : الو هلا
بدر عرف انها سولاف وقرر انه يكلمها دام انها سمعت صوته : هلا والله بالغلا كله
سولاف : من انت ووش تبي , وبعدين شلون عرفت اسمي
بدر – فديت المعصب انا - : ماعرفتيني
سولاف – جا على بالها انه صوت بدر بس هي ماخذه عنه فكرة انه مؤدب مره ومايسوي هالحركات واستبعدت انه بدر - : لا ماعرفتك !
بدر بهدوء وحب : أنا بدر
سولاف بصدمه : بدر !! ووش قصدك من هالحركه بتختبرني يعني ولا وشو ؟
بدر : سولاف اسمعيني .. انا .. انا .. احبك مووت
وماتتخيلي كيف افكر فيك طول الوقت على بالي وماني قادر اشيلك منه
سولاف سكتت من الصدمه
وبدر بدوره سكت مراعي صدمتها ويستنى منها جواب ..

ثلاث دقايق بعدها تكلمت سولاف : بدر لاتمزح معي هالمزح
بدر : وربي مااا امزح وش تبين اسوي عشان اثبت لك !
سولاف تبي عذر عشان تسكر : امي جايه باي ..

وسكرت على طول وما اعطت مجال لبدر ينطق حرف ..

رهف كانت جنب اختها وسامعه الكلام كله
بعد ماسكرت سولاف ناظرت بأختها رهف بصدمه ورهف بدورها مصدومه بعد !
رهف : باين انه صادق
سولاف : بدر اعرفه مايمزح ولا يكذب ودوم عاقل عشان كذا انا مصدقته
رهف : طيب وش راح تسوين
سولاف : يؤؤ وش تبيني اسوي يعني مراح اسوي شي

--

بدر : آآه احبها احبها
صالح : اووووووووخس يالرومانسي والله ماكنت داري ان كل هالكلام عندك
بدر : هالكلام كله من قلبي مو من عندي
صالح : لالا انت مو طبيعي اليوم شكلك مسحور ولا فيك شي
بدر : ايه مسحور .. بحب سولاف ..

--

صارت الساعه 1 وسولاف راحت لغرفتها تنام ,
انسدحت على السرير وجالسه تفكر بكلام بدر الي قاله لها ,
معقوله يحبني .. بدر حب الطفوله يحبني !
هالشيء ماكنت اتوقعه مره وانا من المتوسط يأست انه يحبني وجمدت حبه بقلبي
بس شكلك يابدر راح ترجع حبي لك مضاعف ..
وجلست ساعه تفكر بحب بدر الى ان اخذها النوم ’’

بيت فاطمه وقت الغداء

الكل كان جالس يتغدى ويسولفون ويتكلمون .,
( جوال محمد يرن )
محمد بأستغراب : يوو من متصل هالوقت
فاطمه : كمل غداك ولا ترد بعدها شوف مين
ميمونه : وامي الصادقه , ياخي ناس فاضيه مايدرون ان الحين وقت غدا
محمد كمل غداه وراح غرفته ياخذ قيلوله كالعاده اخذ جواله وانسدح على السرير .. رقم غريب خلاص ماني متصل اذا دق مره ثانيه برد وانقلب بينام , الجوال رن مره ثانيه اخذ جواله وهو مغمض وفيه نوم
محمد : الو
بنت : هلا والله حمود
محمد سمع صوت بنت استغرب عدل جلسته : من انتي ؟!
بنت : انا وحده هيمانه فيك
محمد حب يلعب عليها ببتسامه : اوف هيمانه مره وحده
بنت : شفت وش مسوي فيني , هيمااااانه فيك
محمد : طيب من وين تعرفيني
بنت : اممممم توقع يعني من وين
محمد : ووش دراني انا !!
البنت سكرت السماعه بوجهه
محمد – بنات اخر زمن – حط جواله ونام

[ بعد شهرين ]

رهف من غرفتها بصوت عالي تنادي سولاف : سوولالالالاف وينك
سولاف كانت جالسه ع اللاب في الصاله سمعت اختها تناديها : هاا وش تبين
رهف بكسل : تعالي ابيك بموضوع
سولاف : ياذا الكسل يختي الي يبيني يجي يكلمني تعالي مانيب جايه لكِ
رهف قامت وجات لأختها : يعني مافي رحمه في قلبك تعبانه وحالتي حاله وماتنزلتي وجيتي
سولاف وهي على اللاب توب ومنشغله فيه : وش موضوعك اخلصي
رهف : اليوم كلمت ميمونه واتفقت معها ان احنا كلنا البنات نسوي طلعه محصلتش وش رايك بس انا طبعاً اشترطت ان ساره ماتكون موجوده
سولاف : اييييييه زين ماسويتوا من زمان ودي اطلع طفشت ووساره عاد كيفكم معاها اظن لو قلتوا لها مراح تجي فقولو لها عشان لاتدري بعدين وتزعل
رهف : لا لا لا لا لا لا لو جات ماني طاالعه سامعه
سولاف : الحمد لله وش فيك على البنت صح متكبره شوي بس قلبها طيب
رهف : قال قلبها طيب قال , ماحد يعرفها كثري انا
سولاف : يالله انا بكلمها بس بعد ما اخلص الشغل الي بيدي
رهف بدون نفس : طيب

اليوم الثاني
جاو سولاف ورهف بيت خالتهم فاطمه عشان الطلعه
جرس بيت فاطمه يرن ( تيتون تيتون .... )
ميمونه : ليلى قومي افتحي اكيد البنات وصلوا
ليلى : ok
هلااا والله نورتوا البيت ياحلوين ادخلوا ميمونه ماخلصت
رهف : اما لسه ماخلصت وش تسوي هذي
ليلى : يعني ماتعرفينها تسوي الشي الي بدقيقه ساعه
سولاف : انتو اجلسو هنا انا بروح اشوف وش تسوي .. وراحت عند ميمونه ..
ليلى : ايييه رهوفه تعالي نسولف من زمان عنك
رهف : ايه والله اشتقت لك ياتوأمي وجلسو يسولفون

سولاف : ميمووونه وش عندك مانبي نتأخر
ميمونه : هلا هلا سولاف ماعندي شي خلاص خلصت بس باقي البس العبايه
سولاف : بسرعه لان عندي موضوع ابي اكلمكم فيه ماقدرت اكتمه عنك
ميمونه : وش عندك قولي
سولاف : في السياره بقول لكم السالفه كلها انتي واختك قبل وبعدها نمر على ساره
ميمونه : غريبه ساره طالعه معنا
سولاف : دقيت عليها وقالت فاضيه وماعندها شي
ميمونه : اجل اكيد رهف الحين فوران
سولاف بضحكه : لسه ماقلت لها انها بتجي ولا ماشفتيها جات الحين
ونزلو عند البنات
ميمونه عناد برهف : يلا بنات لانتأخر عل ساره
رهف : وشوووووووووو ساره جايه قلت لك لاتقولين لها
سولاف : ههههههههههه هدي هدي مراح تسوي شي المسكينه
ليلى : اكيد الحين رهف مراح تطلع معانا
رهف : لا بطلع ماني مخربه على نفسي عشان هالمغروره
سولاف : كفو والله يلا السواق ينتظر برى

البنات : يلا ’’’
وفي السياره سولاف قالت لميمونه وليلى عن قصة بدر لأنها ماتخبي شي عنهم وصايرين شله واصدقاء مره
ميمونه : والله وصار عندك معجبين ومحبين ياسولاف من قدك ,
ليلى : بس مره ماتوقعتها من بدر
سولاف : ايه حتى انا
ميمونه تطالع سولاف بنظرات فرح لان سولاف قبل قالت لميمونه انها تحب بدر وهم صغار
وسولاف كانت فاهمه نظراتها وهم يتكلمون وصلو عند بيت فهد
ميمونه : سولاف انتي انزلي ناديها يمكن تصادفي الحبيب ,
سولاف بخجل على غضب : اقول اسكتي بنزل اناديها بسرعه وبرجع
ميمونه ببتسامه : نستناك

12-13-2009, 06:38 AM

تابع

نزلت سولاف ودقت الباب ,

مشعل فتح الباب

سولاف : هلا مشعل وين اختك ساره
مشعل : هناك بالمطبخ
سولاف – يووو وش اسوي الحين ادخل ؟ طيب لو شفت بدر .. واذا شفته وش بيصير يعني بتنقلب الدنيا – ودخلت وراحت عند ساره
سولاف : هلوو سارونا يلا مشينا
ساره : وش فيكم انتو تأخرتوا مره
سولاف : ميمونه الله يهديها اخرتنا
ساره : يلا خلينا نمشي لانتأخر اكثر وطلعوا من المطبخ وكان بدر داخل للبيت
بدر شاف سولاف وكبرت الدنيا في عينه وفرح قلبه صار له كم شهر ماشافها

بدر : السلام عليكم
سولاف & ساره : وعليكم السلام
بدر : ساره وين رايحه
ساره – ياربي محقق كونان على غفله – : بطلع مع البنات
بدر عيونه عل سولاف – بهدوء- : طيب لاتتأخري
ساره : طيب
وطلعوا
وسولاف كانت متوتره مره بس قالت في نفسها عادي ماصار شي

وراحو السوق وهم ماشين سولاف وميمونه كانو متأخرين عن البنات
سولاف بهمس : شفته
ميمونه : اييه شفناه داخل للبيت قولي وش صار
وحكت سولاف الموقف كله لميمونه
وبعدها راحوا للبنات وكملو التمشيه بدون طاري بدر لوجود اخته ساره ’’

بعد كم يوم عند فهد
حب يطمن على اخوه علي الي مشغول بشركاته وشغله ومو فاضي لأحد حتى لأهله
فهد : الو السلام عليكم
علي : هلا وعليكم السلام شلونك شخبار الوالد والوالده
فهد : بخير الحمد لله ويسلمون عليك انت كيفك وكيف الشغل معك ان شاءالله تمام
علي : والله هالشغل هالكني بس الحمد لله على كل حال كل شي تمام
فهد : علي بغيتك بموضوع
علي : ايه عارف موضوعك وحافظه بعد
فهد : دامك عارفه وحافظه ومليت من سماعه ليش ماتنفذه !
ياخوي ترى الزواج سنة الحياه والفلوس الي عندك ورثها لعيالك
علي : اليوم انا بمر على بيت الوالد وانت تعال وبكلمكم بهل موضوع ,
فهد : على انتظار
علي : اشوفك اليوم العصر
فهد : ان شاءالله

العصر ..
علي : الله يا يمى من زمان عنك وشلونك وش علومك ووشلون ابوي ومزرعته
ام علي : الحمد لله بخير وانت ياولدي بشر عن شغلك شلونه
علي : عال العال
ام علي بعتب : زين جيت زرتنا , حسبت انك نسيتنا
علي : جيتك وجايب معي موضوع بيفرحك وبيطيرك فرح بعد
ام علي : قول فرحني
علي : انا قررت اتزوج وخطبت
ام علي بفرحه : اخيراً مابغيت تتزوج دخلت الاربعين ولا تزوجت
ومن سعيدة الحظ هذي
علي : بنت حلال تشتغل عندي سكرتيره
ام علي : ووشلون ناوي تسوي العرس
علي مانبي عرس ولا هم يحزنون حفله بسيطه تفي بالغرض وكلمت البنت على هالشي وهي موافقه
ام على : أي احسن لكم
فهد وهو داخل : السلام عليكم
الكل : وعليكم السلام
ام علي : اليوم عدنا خبر يفرح .. مو يفرح يطير فرح
فهد : خير
ام علي : علي قرر يتزوج وخطب بعد
فهد : اخيراً قررت تتزوج
علي : العمر يمر وبيخلص ولا تزوجنا فخلاص قررت اتزوج ,
وعلى فكره الزواج يوم الخميس

.....
وتزوج علي وسافر شهر العسل باريس ’’

والكل فرحان انه اخيراً تزوج وسواها

بعد 5 شهور جات اجازة الصيف
سولاف و ميمونه تخرجوا من الثانوي ميمونه قدمت على جامعات وسولاف ماتبي تكمل ماصدقت تخلص ثانوي

وعلي ولد فهد جاته بعثه يكمل طب برا والكل فرحان له ..

( بيت فهد )
علي : يمى انا ودي اتزوج واسافر بزوجتي برا
كوثر بفرح وكان في بالها رهف : هذي الساعه المباركه ياولدي بكره بروح بيت عمتك وبخطب رهف لك
علي بوهقه : وش رهف يمى انا مابي رهف
كوثر : ليش وش فيها رهف زين واخلاق
علي : رهف والنعم فيها والله يرزقها ولد الحلال بس انا حاط بنت ببالي ..
كوثر باستغراب : من هي هالبنت !
علي : ميمونه يمى
كوثر : ميمونه والنعم فيها بس انا كان خاطري رهف لك ,, يلا الي تبيه بيصير وبكره بخطبها لك
علي بفرح : الله يخليك يا احلى ام بالدنيا

في بيت ام عبد العزيز
عبد العزيز : يمى وش صار على موضوعي الي كلمتك عنه
ام عبد العزيز : أي موضوع ؟!
عبد العزيز : وتقولين هالموضوع ماينسي .. موضوع زواجي من سولاف
ام عبد العزيز : ايه ذكرتني ان شاءالله بكره نروح عندهم ونخطب سولاف
عبد العزيز – متى يجي بكره –
نوره سمعت كلام امها ودقت على سولاف
سولاف : هلااا نوره هلااا بالغلا كله وحشتيني فدييتك
نوره : وانتي اكثر ياقلبي شلونك شخبارك
سولاف : بخير بسماع صوتك الحلو انتي كيفك
نوره : انا تمام الحمد لله وعندي لك مفاجئه تطير العقل
سولاف : وش عندك
نوره : بكره انا وامي جايين مع اخوي وبتعرفين ليه جايين
سولاف بشك : طيب حياكم الله

اليوم الثاني
في بيت هدى

عبد العزيز : والله يابو سولاف مادري من وين ابدأ
بس انا راح افاتحك بالموضوع على طول
احنا جايين نطلب يد سولاف لي انا
عبد الله وهو عاجبه عبد العزيز : حياكم الله والراي الاول والاخير بيد البنت
نقول لها ونرد لكم بأذن الله ,
عند الحريم
ام عبد الغزيز : ماشاءالله تبارك الرحمن الله يخليها ويحفظها لكم
هدى : امين رب العالمين
سولاف بضيق : ويخليك يارب
رهف تناظر اختها وبنظرتها تقصد وبدر ؟!؟!
وسولاف فاهمه نظرات اختها ومهمومه حيل

استأذنت ام عبد العزيز مع بنتها وطلعوا
جا عبد الله وقال لسولاف الموضوع
عبد الله : الرجال باين عليه انه شاريك يابنتي
وانا من ناحيتي عاجبني ومطمن تجاهه
ومابيك تجاوبيني الحين خذي وقتك بالتفكير
سولاف بحزن : طيب يبه
--
هدى : والله البنات كبروا وراح يفارقونا
عبد الله : سنه الحياه وش نسوي
هدى : الله يكتب الي فيه خير

( بعد كم يوم )
هدى دقت على زوجة اخوها كوثر
هدى : الو السلام عليكم
كوثر : وعليكم السلام هلا هدى كيفك وكيف البنات
هدى : تمام الحمد لله و قبل كم يوم جاو خطاب لبنتي سولاف
كوثر بضيق لانها كانت تبي سولاف لبدر : مبروك ياوخيتي
وكيف العريس عساه كويس
هدى : والله والنعم فيه الكل يمدح فيه وعاجب عبد الله مره وفرحان انه جا وخطب سولاف
كوثر : زين زين وسولاف كيفها موافقه
هدى : للحين ما اخذت منها كلمه اسألها تقول خليني افكر اكثر
كوثر : خليها تفكر على راحتها
هدى : الله يكتب الي فيه خير ’’
كوثر سكرت السماعه مع هدى فرحانه لسولاف وبنفس الوقت متضايقه لانها كانت تبيها لولدها بدر /
بدر : السلام عليكم
كوثر : وعليكم السلام هلا ولدي
بدر: كيفك يم طمنيني عنك
كوثر : الحمد لله
بدر : دوم يارب ولا يغير عليك
كوثر : امين
قبل شوي اتصلت علي عمتك هدى وقالت لي ان بنتها سولاف انخطبت
بدر بصدمه : انخطبت !!
كوثر : ايه خطبها واحد اسمه عبد العزيز تاجر كبير واسمه طيب بالسوق وعنده حلال واخلاق ..
بدر بضيق وهو حاس ان الارض بتنشق وتبلعه : الله يوفقها ......
كوثر : وعندي لك خبر ثاني
بدر : وشو
كوثر : بعد كم يوم بخطب لاخوك علي
بدر : جد والله ! يعني سواها قبلي
كوثر : ايه حاط عيونه على ميمونه
وانا بعد كم يوم بكلم امها على الموضوع
بدر : انا استأذن الحين بطلع شوي
كوثر : لاتتأخر يمى
بدر : ان شاءالله

بدر طلع وركب سيارته شوي ويبكي على حظه مع سولاف وكيف انها انخطبت لغيره !

--
سولاف : رهف وش اسوي قولي لي !!
رهف : دامك تحبين بدر وبدر يحبك لا توافقين
سولاف : بس أكيد امي راح تسألني ليه مو راضيه فيه
رهف : لا ما اظن واذا سألتك قولي لها مو عاجبني شكله مع انه وسيييييييم مره ههه
سولاف : اما مو عاجبني شكله مراح تصدقني الرجال مملوح
بس ماعندي غير هالعذر ...
رهف : قومي الحين نروح ونقول لها رايك
سولاف : يلا
هدى كانت بالمطبخ تجهز العشا
دخلوا سولاف ورهف عليها
هدى : الله جابكم ساعدوني شوي في الطبخ الشغاله سافرت ولافي احد يساعدني
سولاف : يمى انا قررت
هدى : ها يمى بشري
سولاف بخجل : مابيه
هدى : يؤ يم ليه وش فيه الولد
فلوس واخلاق وجمال
سولاف بوهقه : أي جمال يمى انا هالرجال ما اطيقه ولا اطيق شكله من عرفته من اخته والحين جاي يخطبني
هدى : على العموم الشي بيدك وماني جابرتك على شي
فكري اكثر احسن لك
سولاف : خلاص يمى مابي افكر اكثر وقررت
هدى : اجل الحين اتصل على ام عبد العزيز واقول لها
سولاف : ok ..

بعد العشاء كلمت هدى ام عبد العزيز وقالت لها برد سولاف
سكرت ام عبد العزيز من هدى وخاطرها مكسور على ولدها
نوره : يمى شفيك !
ام عبد العزيز : سولاف رفضت اخوك
على هالكلمه دخل عبد العزيز
عبد العزيز بجنون : رفضتني !! نوره هاتي رقمها بسرعه اكلمها
نوره : وش فيك هدي في الف بنت غيرها
عبد العزيز بصراخ : انا مااني متزوج غير هالبنت اقول لك هاتي رقمها
نوره وهي خايفه اول مره تشوف اخوها الحنون كذا عطته رقم جوال سولاف
عبد العزيز دق عليها
سولاف كانت جالسه بغرفتها وبتاخذ شور
قبل لا تدخل الحمام سمعت الجوال يرن
سولاف – رقم غريب ! - : الو
عبد العزيز : سولاف اسمعيني
ان ماتزوجتيني بقتلك وبقتل نفسي بعدك فاهمه
بقتللللللللللللللك لاتحسبيني اتكلم بس انا اسويها عشان حبي الكبير لك ما اتحمل تكوني لغيري ولا انك ماتكوني لي انا ما اقدر اعيش بدونك تحملت حبي لك سنوات واذا ماتحبيني انا بخليك تحبيني غصب سامعتني
سولاف كانت مصدومه ومو عارفه ترد
عبد العزيز سكر الجوال ورماه وطلع من البيت معصب
وام عبد العزيز ونوره مصدومين من تصرفات عبد العزيز والكلام الي قاله لسولاف

سولاف رمت نفسها على السرير وهي تبكي وخايفه
وقالت بنفسها اتزوج ولا يقتلني هالمجنون
وضحت بحبها لبدر وحبه لها

( اليوم الثاني )
سولاف راحت لامها وقالت لها انها غيرت رايها وفكرت زين وهي موافقه
هدى ماصدقت ان بنتها وافقت وفرحت كثير وقالت لأم عبد العزيز على طول وام عبد العزيز عارفه سبب موافقتها بس قالت بنفسها راح تحبه وتتعود عليه ....

وكان عبد العزيز مستعجل وحدد وقت الزواج بعد اسبوعين يوم السبت ’

وفي نفس اليوم كوثر كلمت فاطمه على ميمونه وعلي
وفاطمه قالت لميمونه وميمونه ماكان عندها مانع وقالت بتكمل معاه دراستها برا

سولاف ماكان عندها الا اسبوعين تجهز لزواجها
هدى : يلا يابنات تأرنا على السوق
رهف : وش فيه مستعجل هذا كان خلاها شهر على الاقل
هدى : وش دخلك بالرجال انتي / الله يرزقك بولد الحلال قولي امين
رهف بخجل : يمى وش هالكلام توني صغيره انا
هدي بضحكه : يلا مشينا
سولاف كانت متضايقه مره ولا بيدها شي
واستسلمت لعبد العزيز وتهديداته
مرو الاسبوعين والكل يتجهز للزواج
وعلي ولد ابو علي رجع من شهر العسل مع زوجته لزواج سولاف

12-13-2009, 06:38 AM

جا يوم السبت الصباح
سولاف ذيك الليله ماعرفت تنام
ومهمومه من هالزواج الاجباري وتفكر في بدر ,
سولاف – آه يابدر شكله مو مكتوب لنا نكون مع بعض .. خلاص الحين انا متزوجه مايحق لي افكر الا بزوجي .................. –
الكل راح الصالون ميمونه كانت حزينه على سولاف لأنها تدري بحبها الكبير لبدر , وسولاف قالت لها قصة عبد العزيز وتهديده لها بالقتل
جاء الليل وسولاف راحت القاعه .. وكانت بغاية الجمال والنعومه , وصايره احلى وحده بين الكل ..
( بدر ماحضر الزواج تعذر بأنه مريض و مايقدر يحضر )
دخلت ساره على سولاف وشافتها وقتلتها الغيره منها ومن جمالها
ساره بتكبر ومن غير نفس : طالعه قمر ماشاءالله
سولاف – هالبنت ضد اخوها بكل شي مادري ليه ماطلعت عليه – : تسلمين من ذوقك
زفوها والكل كان مبهور بجمالها و فستانها وكل شي كان كامل وهي طبعاًَ كان قلبها يعتصر حزن على بدر
عبد العزيز كانت الدنيا مو سايعته فرحه
زفوه على سولاف وكان مبهور بجمالها ويحمد ربه انه رزقه وحده مثل سولاف جلس جنبها ونظراته الحاره المليئه بالشوق ماشالها عن سولاف
قال لها بهمس : احبك
سولاف : وانا ماحبك
عبد العزيز : بخليك تحبيني غصب مثل ماتزوجتيني غصب
سولاف طنشته ولا كأنها سمعت شي ,,

زفوهم للفندق الكل بارك وراح
سولاف كانت واقفه ومو عارفه وش تسوي ومتوتره مره ,
حست بأحد يحضنها من وراء وهمس في اذنها : فديت الخجلان
ولفها عليه وباس وجهها ورقبتها بحراره
سولاف كانت تحس بلهيب انفاسه عليها بس ماكان بيدها شي زوجها وهذا من حقه واستسلمت له ......................

12-14-2009, 11:25 AM

’,

إإإ

You
يعطيك الف الف عافيه يارب
ما قصرت
مجهود جدا رائع

’,

12-15-2009, 06:43 AM

يعطيك الف علىى مرورك علىى الموضوع

12-16-2009, 05:47 PM

’ ‘
يـ ع ـطيك العآفيـه

تقبـل مروري
’ ‘

03-20-2010, 03:44 AM

يـعـطـيك الـ ع ـآفيـه
على مرورك
//
برستيج

07-27-2010, 03:12 PM

تجنن القصة مشكور

أدوات الموضوع
مشاهدة صفحة طباعة الموضوع أرسل هذا الموضوع إلى صديق
طريقة عرض الموضوع
العرض العادي الانتقال إلى العرض المتطور الانتقال إلى العرض الشجري

منتديات سعودي بويز

تحت الأرض أحبك - بقلمي -

تحت الأرض أحبك - بقلمي -

الإهداءات